Lhoksukon | Infoacehutara.com – Peujabat Bupati Aceh Utara, Azwardi AP geupeugoet acara jeip kupie beungoh deungon kalangan wartawan nyang na di Aceh Utara nibak uroe Seulanyan, 29 Agustus 2022.
Neupeugah le Bupati, acara nyan katrep that geurencana, teuma meuseubab leu that kegiatan peusaboh dan peusahoe ureung keu peugrak buet peumerintahan sehingga meutunda.
Dalam acara nyang geupeugoet di Aula Kanto Bupati bak tingkat peut nyan, Bupati neupeusampoe nibak awak wartawan. Geupeugah le bupati, wartawan nyoe nakeuh mitra po peumeurintah dalam hai seumeugah haba pembangunan.
Azwardi geupakat awak wartawan untuk ikot pakat lam pembangunan di Aceh Utara seusuai bideung wartawan, masalah ureung gasien ngon ureung fakir, masalah aneuk miet nyang paneuk (stunting), pih masalah pakiban peubeudoeh taraf hudep masyarakat.
Neupeugah lom le Bupati, meukeusued acara nyan nakeuh untuk silaturahmi ngon beu meusaboeh dalam hai peusampoe haba untuk masyarakat, teuleubeh lom haba teuntang peumbangunan.
“Geutanyoe baro 45 uroe ditunyoek seubagoe Pj Bupati di Aceh Utara, seugala macam masalah nyang na jinoe akan seuleusoe apabila geutanyoe ban mandum tameusaboeh lam tabangun bumoe Pase nyoe,” kheun Azwardi.
Dilikoet nibak nyan, Azwardi geupeugah lom bahwa gobnyan bersama seluruh po peumeurintah kabupaten Aceh Utara geuharap masukan dan saran dari kalangan awak wartawan.
“Pihak peumeurintah meuharap chit masukan dari kalangan wartawan teuntang pakiban kondisi di lapangan, jadi taharapkan beu terjalin sinergi,” tamah Azwardi.
Ikot seureuta lam acara nyan peunguruh organisasi wartawan, dari media koran, tivi, radio, ngon wartawan media onlen nyang na lam kawasan Aceh Utara. Sementara di Pj Bupati hadir ngon ban mandum keupala dinaih ngon peujabat peumeurintah kabupaten Aceh Utara.
Salah sidroe wartawan nyang hadir, Zulfikar Syarif bak kesempatan tanyong jaweub ngon Bupati neupeugah teuntang harapan awak wartawan adak jeut peujabat beu geutem bi haba saat dikonfirmasi le wartawan.
“Bek le na keupala dinaih nyang hana geutem konfirmasi ngon wartawan, beu geutem bet hape, meuhan pakiban cara ta peusampoe haba keu masyarakat, adak jeut ukeu bek na le nyang lagee nyan rupa,” kheun Bang Jol, dari media onlen marjinal.id
Acara nyang bak jadwal poh 8 beungoh nyan, geumulai bak poh 9 watee Indonesia blah roet barat. Acara meulangsong deungon suasana hana formal that, watee takalon ruman wartawan teukhem rumeih bahgia.
